មិនទាន់គ្រប់អាយុចង់បើកបររថយន្តអុកឡុកពេញគ្រួសារ ម្តាយប្តឹងឲ្យនគរបាលឃាត់យកទៅអប់រំ

0
201

ភ្នំពេញ៖ ក្មេងប្រុសម្នាក់ មានអាយុទើបតែបាន១៦ឆ្នាំ មិនទាន់មានប័ណ្ណបើកបររថយន្តផង បែរជាចង់បើករថយន្តតែត្រូវក្រុមគ្រួសារហាមឃាត់ព្រោះខ្លាចខុសច្បាប់និងមានគ្រោះថ្នាក់ដល់អ្នកដទៃ បែរជាផ្ទុះកំហឹងអុកឡុកក្នុងផ្ទះ ហើយក្រុមគ្រួសារទ្រាំលែងបានក៏ប្តឹងសមត្ថកិច្ចឲ្យ ឃាត់ខ្លួនយកទៅអប់រំ ។

ករណីនេះបង្កឲ្យមានការភ្ញាក់ផ្អើល កាលពីវេលាម៉ោង១០ និង៣០នាទី ព្រឹកថ្ងៃទី១៧ ខែមករា ឆ្នាំ២០១៧ នៅចំណុចផ្ទះលេខ៥៣ តាមផ្លូវ២០៧ ក្រុម៣ ស្ថិតនៅភូមិ៤ សង្កាត់​ទំនប់​ទឹក ខណ្ឌចំការមន ។

សមត្ថកិច្ចមូលដ្ឋានបានឲ្យដឹងថា ក្មេងប្រុសត្រូវឃាត់ខ្លួនមានឈ្មោះ មាស វឌ្ឃនា  អាយុ ១៦ឆ្នាំ មុខរបរជាសិស្ស ស្នាក់ផ្ទះលេខ៥៣ តាមផ្លូវ២០៧ ក្រុម៣ ស្ថិតនៅភូមិ៤ សង្កាត់ទំនប់ទឹក ខណ្ឌចំការមន។

ក្រោយឃាត់ខ្លួនក្មេងប្រុសរូបនេះ បានប្រាប់សមត្ថកិច្ចថា ខ្លួនមានបងប្អូន ៣នាក់ ប្រុស២នាក់ ស្រីម្នាក់ ហើយខ្លួនជាកូនប្រុសទី២ ដែលមានម្ដាយឈ្មោះ ធឹម ប៉ូវត្តី អាយុ ៤៦ឆ្នាំមុខរបរនៅផ្ទះ និងឪពុកមានឈ្មោះ មាស សុក្រិត  អាយុ ៥៧ឆ្នាំមុខរបរមន្រី្តកងរាជអាវុធហត្ថក្រុងព្រះសីហនុ ។ នៅព្រឹកនេះ ខ្លួនមិនបានប្រើអំពើហិង្សាក្នុងគ្រួសារទេ គ្រាន់តែចង់យករថយន្តតូយ៉ូតាកាម៉ារី ពណ៌ស ស៊េរីឆ្នាំ២០០៧ ពាក់ស្លាកលេខ ភ្នំពេញ 2O-5565 របស់បងស្រីបើកដើរលេង តែម្ដាយ និងបងៗមិនព្រមឲ្យ ដោយសាររថយន្តនេះឪពុកជាអ្នកទិញឲ្យជិះរួមគ្នា មិនមែនឲ្យកូនមួយណាដាច់មុខទេ។ដូច្នេះហើយខ្លួនគិតថា ខ្លួនក៏មានសិទ្ធ ដែរ រឿងអីក្រុមគ្រួសារមិនព្រមឲ្យជិះ។ ទង្វើបែបនេះធ្វើឲ្យខ្លួនខឹងក៏ប្រើពាក្យសម្ដីខ្លាំងៗ ទៅលើអ្នកផ្ទះ មិនដឹងរឿងអីស្រាប់ក្រុមគ្រួសារទៅប្ដឹងសមត្ថកិច្ច ចុះទៅឃាត់ខ្លួនយកទៅអប់រំ បែបនេះឡើយ ។

ចំណែកនគរបាលប៉ុស្តិ៍ទំនប់ទឹក បានឲ្យដឹងថា ក្រោយពីឃាត់ខ្លួនយុវជនខាងលើ យោងតាមពាក្យ បណ្តឹងរបស់ក្រុមគ្រួសារ យកទៅសួរនាំ និងធ្វើតេស្តទឹកនោមរកសារធាតុញៀន តែមិនមានសារធាតុញៀនទេ ត្រូវបានសមត្ថកិច្ច ធ្វើការអប់រំតែប៉ុណ្ណោះ ហើយកន្លងមកក្មេងប្រុសម្នាក់នេះ ធ្លាប់មានបញ្ហាក្នុងគ្រួសារដោយប្រើពាក្យសម្ដីគំរាមកំហែងអ្នកផ្ទះ ត្រូវបានសមត្ថកិច្ចចុះទៅធ្វើការអប់រំនៅផ្ទះម្ដងហើយ តែមិនបានប៉ុន្មានខែផង ក៏ត្រូវក្រុមគ្រួសារដែលជាម្ដាយបង្កើត ជាអ្នកប្ដឹងសមត្ថកិច្ចឲ្យចុះឃាត់យកទៅធ្វើកិច្ចសន្យា​ឈប់ប្រព្រឹត្តទៀតម្តងទៀត ៕ អូនធួក

 

LEAVE A REPLY

Please enter your comment!
Please enter your name here