ភ្នំពេញ៖និសិត្សសកលវិទ្យាល័យភូមិន្ទភ្នំពេញម្នាក់ត្រូវជនសង្ស័យធ្វើសកម្មភាពឆក់ទូរស័ព្ទ ខណៈដែលជនរងគ្រោះជិះម៉ូតូធ្វើដំណើរតាមផ្លូវទៅផ្ទះវិញ។ ហេតុការណ៍នេះបានកើតឡើងកាលពីវេលាម៉ោង១៦:០០នាទីល្ងាចថ្ងៃទី១០កក្កដា២០១៧ស្ថិតនៅចំណុចផ្ទះលេខ៤២សេភូមិ១សង្កាត់បឹងសាឡាងខណ្ទទួលគោករាជធានីភ្នំពេញ។
ជនសង្ស័យត្រូវបានគេស្គាល់ឈ្មោះជា វណ្ណថេងហៅថេងភេទប្រុសអាយុ១៧ឆ្នាំជនជាតិខ្មែរមុខរបរសិស្សវិទ្យាល័យជាសុីមសាមគ្គីស្នាក់នៅផ្ទះជួលផ្លូវ២៧១សង្កាត់ទំនប់ទឹកខណ្ទចំការមនរាជធានីភ្នំពេញ។ចំណែកឯជនរងគ្រោះមានឈ្មោះនាង រចនាភេទស្រីអាយុ២៤ឆ្នាំជនជាតិខ្មែរមុខរបរនិស្សិតច្បាប់ឆ្នាំទី២នៅសកលវិទ្យាល័យភូមិន្ទភ្នំពេញមានស្រុកកំណើតនៅផ្ទះលេខ២៤៤ផ្លូវ៣៦៩ភូមិព្រែកថ្មីសង្កាត់ព្រែកថ្មីខណ្ទច្បារអំពៅរាជធានីភ្នំពេញ។
តាមប្រភពព៌ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញជនរងគ្រោះកំពុងដើរតាមផ្លូវកាន់ទូរស័ព្ទដៃមួយគ្រឿងម៉ាកSamsung Galaxy A7ស្រាប់តែប្រទះឃើញជនសង្ស័យជិះម៉ូតូមួយគ្រឿងម៉ាកហុង ដា ពណ៌ខ្មៅសេរី២០១១ពាក់ស្លាកលេខភ្នំពេញ1AU-4445ធ្វើដំណើរតាមពីក្រោយឆក់ទូរស័ព្ទដៃរបស់ជនរងគ្រោះ គាប់ជួននឹងកម្លាំងនគរបាលខណ្ឌទួលគោកកំពុងតែជិះម៉ូតូល្បាតនៅក្នុងមូលដ្ឋានដើម្បីការពារសន្តិភាពកុំអោយមានបទល្មើសកើតឡើងក៏ដេញតាមចាប់រហូតដល់ឃាត់ខ្លួនជនសង្ស័យបន្ទាប់ពីធ្វើសកម្មភាពរួច។
បច្ចុប្បន្ននេះកម្លាំងនគរបាលបានប្រគល់ទូរស័ព្ទដៃអោយជនរងគ្រោះវិញ។ដោយឡែកជនសង្ស័យកម្លាំងនគរបាលយកទៅរក្សាទុកនៅអធិការដ្ឋានទួលគោកដើម្បីកសាងសំណុំរឿងចាត់ការទៅតាមផ្លូវច្បាប់៕ខុងមុីង